da Carin Caduff
Mes peis fan mal. Vai surviu entochen mesanotg.
Mes cavels ners ein da grass, fredan da curry e
fem.
Ell’ustria denton, freda ei d’ odurs masculinas.
Fried dad umens. Aftershave, cigarettas e
suadetsch. Il bia ein ils umens nos hosps ed il bia ein
els persuls.
Empau persula para era la vera en siu det. Ed aunc
pli persula sesenta mia queissa, cura che siu maun
setschenta sin ella.
Denton gi astgel jeu nuot. Jeu tegn en il flad,
siarel ils egls e dumbrel sin quater.
Sch’jeu tegn en il flad lu baghegia miu tgierp
in’armadira entuorn miu pèz. Nuot sa entrar, nuot
vegnir maneivel.
Ils umens vegnan persuls.
Las dunnas ein a casa tier ils affons. Ellas
cuschinan e preparan lur letgs. Scuorlan ora ils
tapets & bandischeschan ils derschalets. Strehan
ils cavels dil frunt, fan plaz per ina buna. Ina da
bunanotg - ina da schurmetg.
Cura ch’jeu fladel en - fladan ellas ora. Nies flad
secolligia, fuorma in quirass.
Nus essan en segirtad.